# llms.txt 係咩？中小企要唔要整一個？ llms.txt 係一份寫俾 AI 睇嘅網站說明。但 AI 而家實際上讀唔讀？用公開數據同我哋自己嘅爬蟲實測，講清楚中小企應該點決定。 原文：https://www.haoflowai.com/learn/llms-txt-for-sme 發佈日期：2026-09-15 --- 近排開始有人同你講：「你個網站要整個 llms.txt 㗎，唔係 AI 搵你唔到。」假設你開緊一間裝修公司，聽到呢句，反應通常係兩個極端 —— 一係即刻 WhatsApp 個網頁佬叫佢加，一係當佢係又一個潮語。 兩個反應都唔算離譜，因為呢件事本身就有兩面。我哋自己個站都有一份 llms.txt。但如果你問我「整咗係咪 AI 就搵到你」，答案係：唔係，而且爭好遠。 ## llms.txt 到底係乜？ 一句講完：一份放喺網站根目錄、專登寫俾 AI 睇嘅網站說明。 呢個做法係 2024 年 9 月由 Answer.AI 嘅 Jeremy Howard 提出，規格放喺 llmstxt.org。出發點好直接：AI 讀一版網頁嘅時候，要連導覽列、彈窗同追蹤 script 一齊吞落肚，而佢一次食得入嘅字數有上限。與其等佢喺一堆雜訊入面自己撈，不如你主動遞一份乾淨目錄過去 —— 你係做咩嘅、有咩服務、邊幾版最重要。格式用 Markdown，冇新語法要學。 不過有一點好緊要：llms.txt 係一個**提案**，唔係一個由邊個機構通過咗嘅標準。呢個分別，落到實際就係下面呢件事。 ## AI 而家實際上讀唔讀？ 誠實答：絕大部分時候，唔讀。 Google 講得最白。佢哋嘅 John Mueller 喺 2025 年 4 月公開講過，據佢所知冇一間 AI 服務講過自己有用 llms.txt，睇伺服器日誌亦見唔到佢哋去查呢個檔；佢仲將 llms.txt 比喻做以前個 keywords meta tag —— 呢個比喻嘅意思係，網站自己話自己關於乜，咁不如直接去睇個站。同年 7 月，Gary Illyes 喺 Google 官方活動上再講一次：唔支持，亦冇打算支持。 到 2026 年 6 月，Google 索性將呢件事寫入官方說明文件，用詞出奇咁直接：你要整 llms.txt 呢類檔案俾第三方服務用，完全冇問題，但佢唔會損害、亦唔會幫助你喺 Google 搜尋嘅能見度同排名，因為 Google 搜尋本身唔會用佢。有趣嘅係，早一個月（5 月）Google 反而喺 Chrome Lighthouse 加咗一個「Agentic Browsing」審核類別，入面有一項就係睇你有冇 llms.txt —— 但嗰個係睇你個站啱唔啱 AI 代理行走，唔係睇搜尋排名；冇呢個檔亦只會標「不適用」。 數字嗰邊。SEO 工具商 Ahrefs 喺 2026 年 6 月出咗一份分析，睇咗十三萬七千個佢自己流量分析客戶嘅網域，入面大約三萬八千個有一份有效嘅 llms.txt。結果係：喺佢哋量度嘅 2026 年 5 月，當中 97% 一次都冇被請求過 —— 份檔擺咗喺度，冇人嚟攞。（Ahrefs 自己亦提醒，佢啲客偏向技術型、識 SEO，所以「幾多個站整咗」呢個比例應該當佢係上限。） 所以如果有人同你講「整咗 llms.txt，ChatGPT 就會推薦你」，呢句而家企唔穩 —— 唔係話佢冇用，係暫時未有人證實佢有用。 ## 咁點解我哋自己都整咗一份？ 因為佢平，而且佢對應緊一個我哋親眼見過嘅問題。 2026 年 9 月 5 日，我哋喺自己一個站放咗幾條誘餌網址，睇下 ChatGPT、Claude、Gemini、Grok 四隻實際會點爬。當日最搶眼嗰個發現係：四隻之中，冇一隻跟住頁面上嘅第二層連結爬入去。即係你唔可以指意 AI 由首頁一路撳入去，自己搵到你埋喺第三層嗰篇文。（呢個係少量觀測，唔係定律；連埋其餘幾個發現，寫咗喺[〈AEO、GEO 係咩？香港中小企嘅 AI 搜尋優化指南〉](https://www.haoflowai.com/aeo-geo.html)嗰版。） 一份列明「我有邊幾版、每版講緊乜」嘅清單，正正就係對應呢件事嘅動作 —— 唔使指意佢一層層撳入去，你一次過列晒有咩喺度；不過佢肯唔肯嚟攞，仲係佢話事。成本就係一個下晝，冇人讀就當冇事發生過。用呢個角度睇，佢係一注落得起嘅細注，唔係一個掣。 > llms.txt 值得整，因為佢真係好平。但唔好當佢係一個掣 —— 撳咗唔會有嘢即刻發生。真正令 AI 讀得明你嘅，係佢指住嗰啲內容本身。 ## 如果淨係做得一件事，做呢件 如果你真係淨係做得一件事 —— 唔好揀 llms.txt，揀純文字版。 分別喺邊？llms.txt 係一張目錄，要對方肯嚟攞先有用；一份唔使行 JavaScript 就讀得到嘅內容，係對方一到埗就攞得走。同一日嗰個實測入面，四隻 AI 有三隻完全冇行過 JavaScript（同樣係單日、四隻嘅小樣本）。即係如果你個網站要行完 JS 先睇到內容，喺佢哋眼中就好可能係一版白紙。 所以次序應該係咁：先確保每一版重要內容，唔行 JS 都睇得齊；跟住將每一段寫到可以獨立睇得明，因為 AI 好多時只會抽一段出嚟引；做完呢兩樣，先至加 llms.txt 做目錄。倒轉嚟做，結果就係得一份精美目錄，但目錄指住嗰啲嘢 AI 讀唔到。 至於幾耐見到效果 —— 技術嗰部分改完即刻生效，但 AI 同搜尋引擎重新爬、重新理解你個站需要時間，一般三個月起先開始見到變化，而且快慢因站而異。冇人保證得到 AI 一定會推薦你，我哋都唔會咁應承。 --- ## 關於呢篇文入面嘅數據 文中數字有唔同來源：我哋自己嘅觀測，只代表標明日期同條件下伺服器收到嘅記錄；Google、研究機構等外部數字，要按佢哋各自嘅量度範圍去睇。兩者都**唔係行業通則**，亦唔等於你個網站嘅結果。要睇得準，有四樣要記住。 **更正記錄（2026-10-13）：**舊版共用聲明寫「我哋寫落嘅每一個數，都係我哋自己部伺服器喺文入面嗰個日子收到嘅記錄」；呢句忽略咗文章亦會引用外部數據，現已改為分清來源。 **一、AI 嘅運作模式同條件會不停轉換。** 佢哋幾時改、改乜，唔會事先通知任何人。今日成立嘅觀察，下個月可能已經唔同。 我哋會持續追住呢啲轉變、重新量度；量到同之前唔同，就會更新呢篇文，並且寫明改咗乜、幾時改。 **二、我哋唔保證所有數據 100% 精準。** 呢句唔係客套。講到 AI 爬蟲紀錄，具體限制包括： - 有 AI 讀嘢嗰陣**完全唔自報身分**，扮成普通瀏覽器（2026-09-05 我哋實測 Grok 出咗 11 次，一次都冇報過，其中一次連 User-Agent 都同真人用 Windows Chrome 一模一樣）。所以任何「AI 讀取次數」都**唔會齊** - 部分公司（例如 Anthropic、xAI）冇公開爬蟲 IP 清單，所以我哋**核實唔到，唔等於係假** - 一次觀測代表嗰一日、嗰一個站、嗰一套設定。一個站試到，唔代表你個站一樣 **三、我哋只講量到嘅，唔講定律。** 講我哋自己嘅觀測時，會寫明「X 月 X 日我哋收到咩」，唔會將一次觀測講成「某某 AI 一律會／唔會點點點」。 一次觀測撐唔起一條定律。我哋寧願句子講得細，都唔想講得靚但企唔穩。 **四、我哋量錯咗會點做。** 如果我哋量錯咗、引錯來源，或者有人攞得出相反嘅伺服器記錄，我哋會喺呢篇文入面**留住原本嗰句**， 再標明更正咗乜、幾時更正 —— 唔會靜靜哋改完當冇事發生。 一個睇唔到更正紀錄嘅網站，先至係最唔應該信嗰種。 有懷疑，或者你手上有唔同嘅記錄，[講聲畀我哋知](mailto:info@haoflowai.com)。攞得出記錄嘅更正，我哋一定出。 --- ## 關於 灝創智能 灝創智能（https://www.haoflowai.com）係一個香港商戶免費宣傳平台，由灝創智能 Haoflow AI營運。 登記免費，平台唔收刊登費亦唔收排位費。新商戶首 7 日按加入時間展示，其後每日輪換；AI 優化分只作診斷，唔影響展示次序。 展示次序唔代表平台對商戶質素、服務或產品作出評分、認證或推薦。