近排開始有人同你講：「你個網站要整個 llms.txt 㗎，唔係 AI 搵你唔到。」假設你開緊一間裝修公司，聽到呢句，反應通常係兩個極端 —— 一係即刻 WhatsApp 個網頁佬叫佢加，一係當佢係又一個潮語。
兩個反應都唔算離譜，因為呢件事本身就有兩面。我哋自己個站都有一份 llms.txt。但如果你問我「整咗係咪 AI 就搵到你」，答案係：唔係，而且爭好遠。
llms.txt 到底係乜？
一句講完：一份放喺網站根目錄、專登寫俾 AI 睇嘅網站說明。
呢個做法係 2024 年 9 月由 Answer.AI 嘅 Jeremy Howard 提出，規格放喺 llmstxt.org。出發點好直接：AI 讀一版網頁嘅時候，要連導覽列、彈窗同追蹤 script 一齊吞落肚，而佢一次食得入嘅字數有上限。與其等佢喺一堆雜訊入面自己撈，不如你主動遞一份乾淨目錄過去 —— 你係做咩嘅、有咩服務、邊幾版最重要。格式用 Markdown，冇新語法要學。
不過有一點好緊要：llms.txt 係一個提案，唔係一個由邊個機構通過咗嘅標準。呢個分別，落到實際就係下面呢件事。
AI 而家實際上讀唔讀？
誠實答：絕大部分時候，唔讀。
Google 講得最白。佢哋嘅 John Mueller 喺 2025 年 4 月公開講過，據佢所知冇一間 AI 服務講過自己有用 llms.txt，睇伺服器日誌亦見唔到佢哋去查呢個檔；佢仲將 llms.txt 比喻做以前個 keywords meta tag —— 呢個比喻嘅意思係，網站自己話自己關於乜，咁不如直接去睇個站。同年 7 月，Gary Illyes 喺 Google 官方活動上再講一次：唔支持，亦冇打算支持。
到 2026 年 6 月，Google 索性將呢件事寫入官方說明文件，用詞出奇咁直接：你要整 llms.txt 呢類檔案俾第三方服務用，完全冇問題，但佢唔會損害、亦唔會幫助你喺 Google 搜尋嘅能見度同排名，因為 Google 搜尋本身唔會用佢。有趣嘅係，早一個月（5 月）Google 反而喺 Chrome Lighthouse 加咗一個「Agentic Browsing」審核類別，入面有一項就係睇你有冇 llms.txt —— 但嗰個係睇你個站啱唔啱 AI 代理行走，唔係睇搜尋排名；冇呢個檔亦只會標「不適用」。
數字嗰邊。SEO 工具商 Ahrefs 喺 2026 年 6 月出咗一份分析，睇咗十三萬七千個佢自己流量分析客戶嘅網域，入面大約三萬八千個有一份有效嘅 llms.txt。結果係：喺佢哋量度嘅 2026 年 5 月，當中 97% 一次都冇被請求過 —— 份檔擺咗喺度，冇人嚟攞。（Ahrefs 自己亦提醒，佢啲客偏向技術型、識 SEO，所以「幾多個站整咗」呢個比例應該當佢係上限。）
所以如果有人同你講「整咗 llms.txt，ChatGPT 就會推薦你」，呢句而家企唔穩 —— 唔係話佢冇用，係暫時未有人證實佢有用。
咁點解我哋自己都整咗一份？
因為佢平，而且佢對應緊一個我哋親眼見過嘅問題。
2026 年 9 月 5 日，我哋喺自己一個站放咗幾條誘餌網址，睇下 ChatGPT、Claude、Gemini、Grok 四隻實際會點爬。當日最搶眼嗰個發現係：四隻之中，冇一隻跟住頁面上嘅第二層連結爬入去。即係你唔可以指意 AI 由首頁一路撳入去，自己搵到你埋喺第三層嗰篇文。（呢個係少量觀測，唔係定律；連埋其餘幾個發現，寫咗喺〈AEO、GEO 係咩？香港中小企嘅 AI 搜尋優化指南〉嗰版。）
一份列明「我有邊幾版、每版講緊乜」嘅清單，正正就係對應呢件事嘅動作 —— 唔使指意佢一層層撳入去，你一次過列晒有咩喺度；不過佢肯唔肯嚟攞，仲係佢話事。成本就係一個下晝，冇人讀就當冇事發生過。用呢個角度睇，佢係一注落得起嘅細注，唔係一個掣。
llms.txt 值得整，因為佢真係好平。但唔好當佢係一個掣 —— 撳咗唔會有嘢即刻發生。真正令 AI 讀得明你嘅，係佢指住嗰啲內容本身。
如果淨係做得一件事，做呢件
如果你真係淨係做得一件事 —— 唔好揀 llms.txt，揀純文字版。
分別喺邊？llms.txt 係一張目錄，要對方肯嚟攞先有用；一份唔使行 JavaScript 就讀得到嘅內容，係對方一到埗就攞得走。同一日嗰個實測入面，四隻 AI 有三隻完全冇行過 JavaScript（同樣係單日、四隻嘅小樣本）。即係如果你個網站要行完 JS 先睇到內容，喺佢哋眼中就好可能係一版白紙。
所以次序應該係咁：先確保每一版重要內容，唔行 JS 都睇得齊；跟住將每一段寫到可以獨立睇得明，因為 AI 好多時只會抽一段出嚟引；做完呢兩樣，先至加 llms.txt 做目錄。倒轉嚟做，結果就係得一份精美目錄，但目錄指住嗰啲嘢 AI 讀唔到。
至於幾耐見到效果 —— 技術嗰部分改完即刻生效，但 AI 同搜尋引擎重新爬、重新理解你個站需要時間，一般三個月起先開始見到變化，而且快慢因站而異。冇人保證得到 AI 一定會推薦你，我哋都唔會咁應承。
